Tres hermanicas eran,
Blancas de rosa y ramas de flor
tres hermanicas eran
tres hermanicas son.
Las dos están cazadas,
la chica en pedrición.
El padre, con vergüenza,
a Rodes la mandó.
En medio del camino,
castiyo le fraguó,
de piedra menudica,
corral al rededor;
ventanas por los mares,
que no suba varón.
El varón, que ya lo supo,
a nadar ya se echó.
Sus brasos hizo remos,
su puerpo navegó.
Nadando y navegando,
al lugar ya arrivó.

—Echame tus trensados
que arriba subo yo.
Echó sus entrensados,
arriba lo subió.
Le lavó piezes y manos,
l'agua se bebió.
Le quitó y a comeres
pexcado con limón.
Le quitó y a beberes
vino de treinta y dos.
Le quitó y mezeliques
almendricas de Estambol.
En medio de los comeres,
agua le demandó.
Agua no había en caza,
a la fuente la enbió.
Al son de los tres chorricos,
la niña se durmió.
Por ayí pasó un cabayero,
tres bezicos le dio;
uno de cara en cara
y otro de corasón.
Al bezico de al cabo,
la niña se espertó.
—¿Qué hizites, cabayero,
matada merezco yo,
matada con un puño,
que dos no quero yo.
—No t'espantes, mi querida,
que'l tu amor so yo.—
La tomó del brasico,
a casa se la yevó.